一般嚟講，女人天生有母性，BB一出世就好自然成為一位媽媽，而男人就算係見到自己個BB出世，都未必識做人老豆。
記得孖B一歲之前，係我同老公大人鬧交鬧最多嘅時候，孖B唔肯食奶、嘔奶、夜晚肚餓狂喊（一隻喊，另外一隻跟住一齊喊…）等等我哋都嘈過，總之就咩都嘈得一餐，當時，我哋感情差到以為我哋會離婚。
有一日，大孖主動要我老公同佢玩，無論老公點Say No，大孖都唔放棄，直至老公放低佢嘅電腦，同佢玩啲無聊嘢，印象中我同佢講：「佢知道你係爸爸，佢好愛你，所以先要你陪佢，你唔好嫌佢煩啦！」。
從嗰日開始，老公大人有所改變，返到屋企會主動抱吓佢地，亦唔再做百彈齋主，會幫手執我啲手尾，唔再佢哋一喊就鬧，原來佢到嗰陣先覺得自己做咗人哋老豆…
到而家孖B 兩歲半，日日都要同老豆玩，老公亦會幫手同佢哋沖涼，我忙緊其他嘢嗰陣，沖奶、換片佢都會幫手，只要我有需要，佢都會出手相助，對我嚟講，已經好足夠！
各位媽媽，如果你覺得你身邊嗰個唔識做人老豆，請你俾啲時間佢同小朋友相處，唔好插手，唔好講唔好做咩，由得佢哋自由發揮，忍到尾先至再討論（記得係溝通，唔係鬧交，唔一定有輸贏。），咁樣可以俾佢體驗吓你嘅辛苦、學吓做老豆之外，更可以令佢同小朋友建立更加好嘅親子關係添！
沒有留言:
張貼留言